Xosé Neira Vilas: Memorias dun Neno Labrego. Capítulo 1 e 2
1. Xosé Neira Vilas, Memorias dun neno labrego
1
EU SON
...
Balbino. Un rapaz da aldea. Coma quen di, un ninguén. E ademais, pobre. Porque da
aldea tamén é Manolito, e non hai quen lle tusa, a pesar do que lle aconteceu por causa
miña.
No verán ando descalzo. O po quente dos camiños faime alancar. Magóanme as areas
e nunca falta algunha brocha para espetárseme nos pés. Érgome con noite pecha, ás
dúas ou tres da mañá, para ir co gando, restrebar ou xuntar monllos. Cando amañece
xa me doe o lombo e as pernas. Pero o día comeza. Sede, sol, moxardos.
No inverno, frío. Ganas de estar arreo ó pé do lume. Muíños apeados. Faladurías de
neves e lobos. Os brazos son coma espeteiras para encolgar farrapos. Murnas, fridas,
dedos sen
tentos.
¡Que saben disto os nenos da vila!
Eles ignoran o que eu penso mentres boto ó corpo un gurrucho de caldo con broa. Ou
o que sinto cando estou no monte pingando,
aterecido, vendo por entre a chuvia un fantasma bretemoso en cada árbore.
A aldea é unha mestura de lama e fume, onde os cans ouvean e a xente morre «cando
está de Deus», como di a madriña. Os rapaces
somos tristes. Enredamos, corremos tras dos foguetes e ata rimos, pero somos tristes.
Temos a pobreza e os trafegos da terra aniñados nos ollos.
Eu quixera andar mundo. Ir por mares e terras que non coñezo. Nacín e crieime na
aldea pero agora síntoa pequena, estreita.
Coma se vivise nun cortizo. Teño pensamentos que non lle podo contar a ninguén.
Algúns non me entenderían e outros chamaríanme tolo. Por iso escribo. E despois
durmo coma unha pedra. Quedo desatafegado, libre, coma se me quitasen de enriba un
bocoi. ¡Cousas miñas! E tamén de Smith, o capitán que estivo na guerra e cando
voltou para a casa púxose a escribir todo o que
lle acontecera. Así está nun libro que me trouxo o Landeiro.
¡Se eu fixese un libro! Nin falar. Ogallá que non me atopen o caderno. Daríame
vergoña. E non é para menos. Porque nel baleiro todo o que sinto. Moi pouca xente o
fai. Todos abren o peteiro para dúas cousas: para dicir a verdade ou para arredarse
dela.
2. Xosé Neira Vilas, Memorias dun neno labrego
2
Na miña casa non me comprendían. E outro tanto acontéceme na do Landeiro. Iso é o
peor que lle pode suceder a un, pero a moita xente non se lle dá.
Eu non sei se esvarío. Vexo o mundo darredor de min e adoezo por entendelo. Vexo
sombras e luces, nubeiros que viaxan, lume, árbores. ¿Que é todo isto? Ninguén me di,
poño por caso, para que serven as estrelas, nin onde morren os paxaros. Sei de certo
que moitísimos anos antes de nacer eu xa había sol e penedos e fuxía a auga polo río.
E estou seguro de que todo seguirá igual despois de que eu morra. Virá máis xente, e
máis, tripando uns nos outros, esquecéndose adrede dos que morreron, coma se non
houbesen vivido.
Escribir no caderno —¡quen o diría!— é coma baldeirar o corazón. Parece un milagre.
Pois á fin de contas non pasa de ser una conversa comigo mesmo. Pero para min é
milagre todo. Dende as pingueiras da chuvia
ata o canto do grilo.
Aínda que se me ocorrese facer un libro, como fixo Smith, de pouco valería o que
contase. Smith estivo na guerra, e eu son a penas «o neno», como me chaman na casa.
Son Balbino. Un rapaz da aldea. Un ninguén.
3. Xosé Neira Vilas, Memorias dun neno labrego
3
PERDIDO
— ¡Nenoooo...!
— ¡Balbino!
Son as primeiras chamadas que recordo. Miña nai e mais a tía Carme baixaban a
valmontes polo agro. Os seus berros batían na
canteira que hai na outra banda do río. Sen facer caso de camiños nin carreiros corrían
a treu, crebando millo. Era despois de xantar.
O sol queimaba. Zoaban alporizados os tabaos.
— ¡Que será do neno!
— ¿Cairía no río?
— ¡Ai Sanantoniño nos valla!
Na véspera dérame meu pai unha somanta por enfarruscar a cara con feluxe ó neno do
señor. Un rapaz moi limpiño que come pantrigo, bebe leite con café e non se ten que
erguer cedo para levar o gando a pacer. Meu pai non quixo saber o que Manolito me
fixera denantes a min. «É o neno do señor e abonda».
Pero por máis que o sexa paréceme que non ten dereito a darme cos seus zapatiños
novos nas canelas, nin cuspirme, nin dicir que, se eles queren, nós teremos que deixar
a casa e as leiras.
Coa rabecha deiteime sen cea e botei a noite esperto, chorando. Tiven mágoa de min
por ser un neno pobre. Os pobres de todo que andan polas portas esfarrapados, e ás
veces ata rouban patacas ou millo para comer, están mellor. Aturan ós de fóra, pero
non ós da casa que queren andar ben co amo. Porque eles comerán ou non, terán ou
non Terán zocos, pero están libres do señor e de Manolito.
Pola mañá erguinme canda todos. Fun con meu pai ó monte. Notoume que andaba
aqueloutrado pero non me dixo nada . E eu
amostrei cara de ferreiro. Voltamos, sen dar fala, cando os bois comezaron a encrechar
o rabo coa mosca.
Despois de xantar marchei para a eira.
Seguiume a tía Carme, pero cando me veu rebalbado á sombra , no pallal, volveuse.
Entón botei o cancelo fóra, atravesei o camiño
4. Xosé Neira Vilas, Memorias dun neno labrego
4
e metinme no agro. Seguín por entre os renques de millo. Camiñaba devagar. O millo
cubríame. Xa non podían verme. A terra estaba dura. Algúns cadullos esfarelábanse
debaixo dos meus zocos. Andei e andei. Debía estar preto do río pois chegou ata min o
balbordo da auga na presa do muíño. Senteime. Quitei os zocos e desabotoei a camisa.
Estaba canso e o sono venceume.
Durmín un bo anaco, non sei canto, e acordei mentres soñaba que Manolito corría tras
de min cunha escopeta.
— «Poida que anden na miña busca», pensei. Pero non me importou.
Meu pai zoscábame sen ter por que, e eu queríalle demostrar que non teño medo. Por
eso fuxira.
E xa daquela teimaba irme para lonxe. Non quería aturar a Manolito.
Púxenme a facer moreas de terra. Sempre me gustou xogar coa terra. Estaba morna a
da tona; a de máis abaixo gardaba algunha
lentura. Primeiro fixen un valo; despois una ponte. Unha ponte con follas de millo e
barba de mazaroca por derriba, a xeito de chan e orelas. Foi cando oín que me
chamaban.
Erguinme de súpeto, pero volvinme a anagar.
— ¡Nenoooo!
Os primeiros berros viñan da banda do camiño; despois pareceume que saían do resío.
Seguín no meu trafego de amorear terra coas mans. Tamén construín un forno, de
croios, e arrinquei millán para poñerlle
darredor. Non me movería de alí. Fixen a promesa de fuxir para sempre da casa, se
meu pai me volvía zoscar.
— ¡Balbinoooo!
Sentino por miña nai, e pola tía Carme, pero que se amolen. Elas tamén me tiñan
bourado, e ademais facíanme rezar. Todos son contra min. Dende o padriño ata meu
irmán Miguel, que inda na véspera de irse para América turroume dos pelos porque lle
andei na Caixa das ferramentas.
Pola tardiña andaban buscándome todos os da casa e tamén algúns veciños. Berraban
preto, lonxe, no agro e nas corredoiras. O meu nome foi e veu polo aire en toda a
5. Xosé Neira Vilas, Memorias dun neno labrego
5
aldea. Xa se fora o sol e inda non me atoparan. Moita xente que non lle importaba de
min, andaba na miña busca. Era coma se procurasen o raposo ou lle
quixeran dar caza ó porco bravo. Eu, mentres, seguía facendo pontes e fornos,
xuntando croios, esfarelando cadullos.
Anoitecía cando sentín bafexar detrás do meu lombo, despois dun maino ruxido de
follas de millo. Revireime. Era Pachín, o can.
Pachín tamén me buscaba. E deu comigo. Traguía a lingua fóra e viña fatigado.
Achegóuseme con agarimo e comezamos a trizar os dous. Queríame falar.
Queríame dicir dalgún xeito que me buscaban, e deille a entender que xa o sabía e que
tanto me tiña. Pachín deu en choutar ó meu redor. Esbargalloume as pontes. Rifeille e
quedouse engruñado, coma pedindo perdón.
A noite caeu de súpeto sobor do agro. Barullaban os grilos e as ras. Espreguiceime.
Puxen os zocos, e, vagoroso, fun indo leiras
arriba. Pachín ceibou un ladriño de amigo e seguiu á miña beira. Cando ía atravesando
a horta, escoitei un berro lonxano que me
chamaba. Entrei na casa. Non había ninguén. Semellaba un cemiterio. Unha campa
baldeira.
Deiteime na cama. Soñei co Manolito e co meu pai. Os dous andaban a enredar un co
outro e o señor divertíase. Mentres, eu choraba. Choraba e ninguén facía caso de min.
Ninguén ollaba as bágoas que me relucían nas fazulas, caían no chan e fuxían cara ó
río, por entre os renques do millo. Pachín seguía á miña beira, coma se quixese
falarme ou chorar comigo.
Cando abrín os ollos vin máis de dez caras darredor de min. Enxoguei as bágoas coa
camisa. Pachín fitoume dende a beira da cama.
Paseille unha man polo pescozo e volvín durmir.