Argazki literatura aurkezpena

1. Orain mende bat Londresko The Wide World Magazineko irakurleak txundituta eduki zituen Louis de
Rougemontek bere bidaia kronikekin. Kanibalekin egindako otorduak, ur-jauzi arriskugarriak, 300 kiloko
dortokak, pelikano mezulariak... deskribatzen zituen. Gero jakin zuten etxetik mugitu gabe idatzi zituela.
Joxean Agirre
Sydney-ko Bondi Beach hondartza famatua. 2009an aste bete pasa behar izan nuen han asko mugitu gabe, kotxe
istripu handia izan eta gero ubeldurak eguzkitan sendatzen. (Argazkilaria: Aitor Azpiroz)

2. Ba al du itxaropenik bizitzaren bideak?
Juan Modesto Arrieta
Bali, Indonesia, 2011-08-30. Iluntzea arroz-soroetan. Zalantzarik gabe, egunaren azken orduak onenak dira uzta
biltzeko. Garai horretan, eguzkia errukitsua da. (Argazkilaria: Dani Sánchez)

3. Aurreneko mutil koxkor
honek hartu duen
kopetakoa ikusita...
min hartu dut nik ere.
Baina irribarre egiten du.
Eta nik ere bai.
Mina tragedia da, barrea
komedia.
Bizitza bezala.
Imanol Epelde
Nias irla, Indonesia, 2009 an, pixka bat lehenago tsunami handi hark gogorrenen
jo zuen tokia. Inguru hartan, helduek hitz egiteko beste gairik ez zuten izaten.
Txikiak, beti bezela, berera. (Argazkilaria: Aitor Azpiroz)

4. Arimarik gabeko siluetak
beira gardenetan preso;
XXL. mendeko ispilukeria.
Perspektiba bat eta bakarra.
Esan,
non dago ihes-puntua?
Nagore Etxabe
Sydney, Australia, 2011-12-28 (Argazkilaria: Dani Sánchez)

5. Esnatu zarenean, euria entzun duzu. Gustura itzuliko zinateke ametsetara.
Hasperen batekin, poliki-poliki jaiki zara, maindire arteko harea nondik atera den asmatu ezinik...
Ana Galarraga
2009. Esperance, Australia.
Hemengo hondartzak Australiako politenak izendatzen dituzte, urtea joan, urtea etorri. (Argazkilaria: Aitor Azpiroz)

6. Hona nator. Hona nator ni izatera, non ekiak itsasoa erre dezakeen. Ilunabarra. Hona nator ahaztera.
Sua. Eta su hartzen dudala sentitzen dut, itsasoak soilik itzal nazakeela.
Paul Beitia
Maui (Indonesia), 2011-08-10. Saioa eta lasaitasuna iluntzean, bertan geratu eta gaua kanpoan igarotzera gonbidatzen duen
leku batean.(Argazkilaria: Dani Sánchez)

7. Presarik gabe doa trena, trabiesaz trabiesa; presarik gabe zarama. Bazoaz, ezer egin gabe;
mugimenduan, baina geldirik. Helmugarik ez duzu ia; bidea bera bada nahikoa helmuga. Zu bazoaz, eta
kanpoko irudiak ere, datozen bezalaxe doaz, instant batez zuri leihoa irekita, bazoazela gogorarazi nahian
bezala. Horregatik ez dago telebistarik trenetan. Samara Velte
2009 Sri Lanka. Ederra da Sri Lanka. Batez ere zainak bezela herrialdea zeharkatzen duen Tren Errumaniar zahar hartatik.
Tiketa erostea beste kontu bat zen. (Argazkilaria: Aitor Azpiroz)

8. Zuri begira dauden hiru haur horiek, hauxe esan zuten:
- Aizu, zu zein zara? Non bizi zara?
- Gustatzen al zaizkizu txupatxusak? Nik jan dudana marrubizkoa zen!
- Aibala! Zure aurpegiko azala nire esku-barrukoa baino zuriagoa da!
Txiliku
Liberia, 2011. Hamasei urteko gerra zibil baten ondoren, herrialdea txikituta dago. Hasierako inpresioa gainditu eta bertan pasa
nituen inoizko lau hilabeterik onenak. (Argazkilaria: Aitor Azpiroz)

9. Begirada beti dator barrendik.
Anjel Lertxundi
Liberia, 2011.Siargao (Filipinak), 2011-10-29. Zerbait bilatzen tematzen bazara, bidean bilatzen zenuen horrek bezainbeste
merezi duten xehetasunak eta uneak galtzeko arriskua duzu. (Argazkilaria: Dani Sánchez)

10. Hain urruna zirudien lanbroartean,
euria egin eta behatz muturretara hurbildu zaigu.
Kati Olaizola
2011, Gogui, Mali eta Mauritaniaren arteko mugan. Kotxez bidaiatzean, mugak ziren beti tokirik zailenak, alde handiarekin. Gaur
Tuareg-en esku egongo da leku hau agian, nork daki. Ez zegoen behintzat ejertzito handirik egun hartan.(Argazkilaria: Aitor Azpiroz)

11. Zu txiki, zu begi, zu ikustezin.
Zure begiradak ttipitzen nau ni.
Xabier Etxeberria
Bohol (Filipinak),2011-10-29. Esku-ahurraren neurrikoa eta ilargiaren neurriko begiak dituena. (Argazkilaria: Dani Sánchez)

12. Denborak, surflari,
uberak uretan goldatzen ditu:
pertsonak, herriak, lekuak,
amodioak...
... areazko gazteluak
marea behean.
Eternitate osoa daukagu,
ubera berdin-berdin errepika
dadin,
gu biok
ostera ere
elkar gaitezen.
Yoseba Peña
2011, Liberia. Dokumental batean ikusi nuen olatu honetara iristeko, 15.000 km egin nituen, 1.001 penuria eta 1.002 toki eta jende polit
ezagutuaz. Azkenean, iritsi nintzenean, bideak bere garrantzia kendua zion tokiari. Orduan hortxe, zuhaitz horren azpian, jarri nuen
kanpina eta geratu nintzen lotan. Lau hilabetetan ez nintzen ia irten herritik. (Argazkilaria: Aitor Azpiroz)

13. - Herriko dentista? Hementxe da, bai. Aurrera, aurrera!
Bertol Arrieta
Surigao (Filipinak), 2011-11-07. Zenbait lekutara argazki-kamera batekin sartzean, erreakzio batzuk mehatxutzat har daitezke.
Zuk irribarre egiten duzu, eta berak irribarre egiten du. Irribarre batek dena aldatzen du. (Argazkilaria: Dani Sánchez)

14. Zatoz, haurra,
bularraren babesera
uxa ditzagun beldur,
tristura eta goseak
tori bizitzarako beharko
duzun
segurtasuna eta elikagaia
oparitu diezaiogun elkarri
gure baitan gordeko ditugun
momentu eder hauek
Goizane Arana
2011 Guinnea, Koundara. Senegaletik Guineara dagoen bidea ezin da esan txarra denik; ez da bidea. Egunen batean kotxez joan
nahi baduzue, tori aholku bat: edo hegazkina hartu edo oinez joan. Aste bi pasa nituen egun batean egiten daitekeen distantzia bat
egiten. Hemen gogoratzen naiz gosaltzen geratu nintzela. Ogia, tea eta arrautza bat, uste dut. (Argazkilaria: Aitor Azpiroz)

15. Zorionez, irribarreak ez du
mugarik.
Aitziber
Etxeberria
Zorionez, oraindik badaude besteek begiratzen duten leku berera begiratzen ez duten pertsonak. (Argazkilaria: Dani Sánchez)

16. Ibaien ertzean, itsas
bazterrean,
egin zuloak hondarretan,
eta sortuko da
hutsetik mundua asmatzen
dakien norbait.
Gari
Berasaluze
2011, Bo eta Bo Waterside artean. Sierra Leona. Erreka guztieTan ikusten ziren diamante eta urre bila lanean.
(Argazkilaria: Aitor Azpiroz)

17. Nork nori itzala? Gizakiak mobilari, edo mobilak gizakiari?
Ainara Agirre
Tana Loth (Indonesia), 2011-09-11. Iluntze sinestezina kostan. Argazki-kamera, mugikorra, edo, ahal izanez gero, zure oroimena,
onak izan daitezke une hori harrapatu eta aurrerago berriro gozatzeko. (Argazkilaria: Dani Sánchez)

18. Basamortuko lehortasunetik, itsasoaren umeltasunerako bidaia
gozoaaaaaaaaaAAAAAAAAAAAAAAAAAAAAAaaaaaaaaaaaaaa...!
Ainhoa Alberdi
.
2010. Mendebaldeko Sahara okupatua oso gutxi habitatuta dagoen herrialde bat da, eta azken urteetan kostara etortzen
diren asko horrelako herrixkatan bizi diren kolono marrokiarrak dira. Urte batzuz han bizitzen dira, arrantzan, harik eta etxera
bueltatzeko diru nahiko egiten duten arte. (Argazkilaria: Aitor Azpiroz)

19. Belarrak trenbidea
irentsi beharra...
baina handiago da
gure zoritxarra
gurean trenbideak
jan baitu belarra.
Andoni Egaña
2009 Sale. Sry Lankan. Budistak ezagutu nituen herrialde bakarra izan zen. Ez omen dute jainkorik gurtzen. Espiritualitatean eta
norberaren ezagutzan omen dago zoriontasuna. Eta bitartean musulmanekin gerran daude iparraldean. ( Argazkilaria:Aitor Azpiroz)

20. Lurra galdu. Hasiera besterik ez da.
Gero jendea, ondasunak, fedea. Dena.
Gauzen zentzua eta barne indarra.
Galdu hizkuntza, galdu hitza.
Galdu gal daitekeen dena
azkeneraino defendatuz
zeure izatearen azken unitatea.
Eta dena oinarrizkora laburtu:
leku bat, denbora bat, pertsona bat.
Hemen, orain, ni.
Jon Benito
Singapour, 2011-05-2. Etxerik gabeko gizon bat indarrak berreskuratzen saiatzen da. Hiri handiek beren aurpegi krudelena
erakustera irits daitezke. ( Argazkilaria: Dani Sánchez)

21. .
Uluwatu (Indonesia), 2011-07-26. Perfekzioa. (Argazkilaria: Dani Sánchez)