a rolada
COUSIÑAS FEITAS NA CASA

Ía a galiña polo rueiro... chea, feliz, estirada,...

e alancando, detrás dela, os dez pitiños da súa rolada

Mais non ve o que pasa detrás e... un parou, non sei a que,

e xa so a seguen nove... na volta de seren dez.

Outro quedou atrás, alasando... Corrían moito.

E agora xa non van nove, agora so a seguen oito

E dos oito, un parou a papar unhas sementes.

Xa non volveu da parada. So seguen á galiña sete.

Outro perdeunos de vista nunha revolta da rúa…

agora so quedan seis... So a seguen media ducia!

Un saíuse da ringleira para pillar un mosquito.

Correu atrás del, e perdeuse. Dos seis que eran... seguen cinco.

Seguían cinco á súa nai, mais un caeu nun burato.

Ían cinco detrás da galiña e agora xa so van catro

Dos catro que a seguían, un mancouse nun traspés.

Sentou á beira do camino… e agora so a seguen tres.

Dos tres pitos que a seguían un quedou a mirar unha flor.

Antes ían detrás tres pitos e agora so seguen dous

Dos dous que aínda quedaban, un veu una xoaniña,

quedou, e so seguíu un andando detrás da galiña.

e o último, ao verse so, volveu a buscar aos irmáns...

e a galiña seguíu tan chea, sen ningún pito detrás

Até que, un pouco adiante, atopou outra galiña
que ao vela tan satisfeita quixo saber a onde ía.

-A ningures –respondeu. -So paseo a miña rolada!
-De que rolada me falas? ...se detrás non levas nada!

Volveuse, ...susto e desgusto,

e saíu escopetada.

Foise por onde viñera, a chorar, desconsolada.

E logo atopou ao primeiro a piar polo camiño

Acolleuno e seguiu coa carreira... aínda lle faltan nove pitos!

Deu logo co da xoaniña,

e co que miraba a flor,

veu e animou ao do traspés,

rescatou ao do burato,

recuperou ao do mosquito,

localizou ao extraviado,

recolleu ao das sementes,

recobrou ao canso

e encontrou ao que parara.

E volveu a ter dez pitos... Recuperara a niñada!

E desde esa, para que ningún se extravíe, nin se perda nin se escape,
ela vai sempre detrás e lévaos a todos diante.