Rutul bible luke 2
- 1. ГьIаса Мусуд гьухуд йыгь
1 Гьа вахтинди Август-пагьIчаагьад бииругъ йидкьыр ай, дуьни-
дуьниаадыы гьадухъунды илсанашды сиягь гьаъ хьур. 2 Квириний
Сириядид кьухьды йишидаа хъуъ гьа сахьусды сиягьбыр йиъий. 3
Сиенебыр джвер сиягьма эдес дуруъура — гьIар выдж гьухуд
шегьерди. 4 Йисухь ки руъура — Галилеядид Назарет хьур
шегьердаа Иудеяди, Вифлеем хьур дур гъад Давыдды шегьерди. 5
Йисухь Давыдды цихилдиклаады йиъий, гьанийды
хыдылашиклаады. Гьа сиягьма иес руъура джуды сус Майрам ки
хъуна. Гьа ухьне кий. 6 Гьабыр Вифлеемди ад гедеэне, гьанийды
рухуд вахт йибкьыри. 7 Гьухура гьанийс джуды сахьусды дух. АркIа
гьыъыри гьание дух, хьели малмыд тIына илхьере, гьис хьуйне
мийманханыди гьабишис ер ывгыр адиший. 8 Гьа джигидаа цIамна
хырыда кал гий хIаIбаIхъIаIнер, гьабыр чIирыы ешемиш диъий,
вышедыхъаъ мал ухIуре ай. 9 Садахьурка гьабишды уликлаа лаъ
лувурзара Аллагьад малаик, ХІаІлаа саъ нур лугъури гьабишды
аа-уу. ХIаIбаIхъIаIнешис гичI йывхIыр, паIрт дуруъура. 10 Амма
малаикере рухьура гьабишде: «ГичI мываъ! Зада ваIс эккед хабар ха
- гьа эккед шадвалды виъи сиене выхьды халкьдис. 11 Гъиигъа
Давыдды шегьерди ихьды Азадчи гьухур а, Ихьды Илагьи, Мусуд!
12 ВаIс гьа хъацIасды лышан мисед йиъи: ваIде тIына кийир ад
аркIыд хыных агаси». 13 Гьааса гьухьудка малаикед бейдаа лаъ
сиене хIаIлма адухъундыбыр лузури, мисе Аллагьахьде шукур
ваъара: 14 «Шукур Йинчихьде! Шукур Йинчихьде! Салам гъана
дишихь Гьанийс хъывгад накьв на илсанар!» 15 Малаикмар хIаIле
хъIаадхIыйне, хIаIбаIхъIаIнеше рухьура са-сынийде: «Дыкьа
Вифлеемди дуруъус, гадкъас, шивди гьади гьыъыр ад, гьидиклаады
хабар виъиди Аллагьара ес сивигыд». 16 Гьабыр телесыхана рыкъIаI
аIчIур, дыхьыр, гадкъыд — адылгара Майрам на Йисухь тIына ад
хынхыхьван. 17 Дукар гьагуйне, хIаIбаIхъIаIнеше ихтилат гьаъара,
малаикере джвершде шыв хьурди. 18 Сиене хъадабцубишис
гьIаламат руъура хIаIбаIхъIаIнешды ихтилатаа. 19 Майрама хьуйне
- 2. сиене йикIе ухIуре, гьадиклаа фикир ваъара. 20 ХIаIбаIхъIаIнер
хъуьдуьргъуьр, хъIудире, Йинчихьде джвершис гьагудмыхъаъ на ун
хъIыхIыдмыхъаъ шукур ваъара: сиъин карбыр малаикере джвершде
гьухьуд кал йишир ай.