1. Coordinadora para o Estudio dos Mamíferos Mariños. Ap. 15, E-36380 Gondomar. Tel 686 98 90 08
O LOBO MARIÑO “NARIGA”,
SUPERA A PRIMEIRA FASE DA RECUPERACIÓN
O lobo mariño NARIGA recollido pola Rede de Varamentos de Galicia
en Malpica recupérase a boa marcha.
Os lobos marinos cincentos (Halichoerus grypus) nacen entre setembro e outubro nas
costas de Irlanda e chegan ata as costas galegas a partir de principios de ano. Desde o ano
1999 a Coordinadora para o Estudio dos mamíferos Mariños, (CEMMA) é a entidade
responsable diante da Consellería de Medio Ambiente da Xunta de Galicia do rexistro,
asistencia, recuperación e liberación das tartarugas e mamíferos mariños varados ou
capturados accidentalmente por interacción con artes de pesca. Este traballo atópase
enmarcado na colaboración que ambas entidades levan adiante para o establecemento da
Rede de Varamentos de Galicia coordinada pola CEMMA.
Entre o ano 1990 e 2011 a CEMMA leva rexistrando un total de 107 lobos mariños,
pertencentes sobre todo a dúas especies, lobo mariño cincento e lobo mariño de capelo
(Cystophora cristata), máis raramente rexístrase a presenza do lobo mariño común (Phoca
vitulina) e do lobo mariño anelado (Phoca hispida). Case a metade dos exemplares foron
localizados con vida, o 45%, e sobre os cales son susceptibles de levar a cabo labores de
rehabilitación. Despois da recuperación, a CEMMA conseguiu devolver ao seu medio o 60%
dos lobos mariños cincentos recollidos con vida, unha das cifras máis altas na recuperación da
fauna salvaxe.
A súa chegada a Galicia
Na madrugada do 14 de xaneiro os percebeiros de Corme detectaron a presenza dun
lobo mariño nas pedras da Punta Nariga. Ao mencer o exemplar permanecía no mesmo lugar,
xa sen posibilidade de voltar ao mar pois a marea baixa impedíalle chegar ao auga entre as
rochas. O animal non facía ningún intento de fuxir, por iso puxérono en coñecemento da Rede
de Varamentos que se dispuxo a recoller ao exemplar. Alá foi a Unidade Móbil da CEMMA con
base en Ferrol, contando co apoio de membros da Policía Local, Protección Civil e Sociedade
Galega de Historia Natural-Ferrol.
Neste momento atopámonos en plena tempada de lobos mariños. Estes exemplares
nacen nas augas irlandesas entre setembro e outubro, dispersándose despois do destete,
motivo polo cal chegan ás costas galegas de xaneiro a marzo. A rede de varamentos
portuguesa xa nos advertira da presenza dun lobo mariño nos Açores e desde Asturias
CEPESMA comunicáranos tamén unhas semanas antes a presenza doutro exemplar.
A Unidade de Coidados Intensivos de Ferrol
A CEMMA conta coa colaboración da Sociedade Galega de Historia Natural que pon a
súa disposición a Unidade de Recepción de Fauna e Coidados Intensivos de Ferrol onde
unha vez transladado o lobo mariño, superará as primeiras fases da recuperación.
Os primeiros momentos, logo da recollida, foron angustiosos dado que o estado do
animal non permitía demasiadas esperanzas, a ausencia de forzas, a deshidratación e o
esgotamento minaba os ánimos do equipo de asistencia que agardaba un triste desenlace. A
asistencia do equipo veterinario dende o primeiro momento marcaba as pautas do rescate e a
rehabilitación.
Unha vez instalado na Unidade de Coidados Intensivos, nas novas instalacións do
Museo da Natureza, NARIGA superaba a primeira noite con éxito, na mañá seguinte a toma de
datos, o diagnóstico e a primeira aplicación do tratamento melloraba o seu aspecto e situación.
2. Día tras días NARIGA foi gañando forza e aprendendo a comer, cousa que conseguiu el
absolutamente só. Neste tempo tratóuselle a lixeira luxación articular da súa aleta pectoral
dereita e alimentouse debidamente. A primeira fase da rehabilitación está rematando e nun par
de semanas chegará ao seu fin.
A segunda fase no Acuario de O Grove
A segunda fase do proceso de rehabilitación será levada a cabo no Acuario de O Grove,
donde se habilitou unha instalación específica para acoller ó lobo mariño, que conta cunha
piscina de 7x7 metros, perfectamente illada, onde poderá exercitar a súa musculatura e gañar
peso. O desprazamento dende a Unidade de Coidados Intensivos de Ferrol ao acuari
oefectuarase mañá domingo pola mañá.
O Acuario de O Grove leva acollendo animais en recuperación dende hai máis de dez
anos, e durante ese tempo funcionou como unidade de recuperación na que foron atendidos un
total de 30 tartarugas mariñas, 20 lobos mariños e 3 cetáceos. A maior parte destes
exemplares superaron a fase de recuperación e foron devoltos ó seu medio.
Necesidades de instalación de recuperación
Dende hai anos a Xunta leva xestionando o proxecto de construcción dun Centro de
Recuperación para a Fauna Mariña que está previsto que sexa instalado en terreos da
Comunidade de Montes de Baredo, en Baiona.
O Centro de Recuperación para a Fauna Mariña permitiría mellorar e centralizar as
labores de asistencia e recuperación dos exemplares, xa que evitaría os desprazamentos dos
animais dun lugar a outro a medida que van superando as diferentes fases do proceso de
recuperación, tal e como acontece na actualidade. A CEMMA colaborou na supervisión e
asesoramento do proxecto de construción deste centro, considerando que dará un forte
impulso ás labores de conservación da fauna mariña.
A presenza reiterada de animais varados na costa de Galicia, moitos deles vivos, e polo
tanto con necesidade de recibir asistencia e precisar actuacións de recuperación acrecenta a
necesidade desta instalación, dende a CEMMA solicitamos que o proxecto se manteña e se
leve a cabo tal e como estaba previsto.
A súa chegada ao Acuario do Grove, está prevista para mañá domingo 26 de
febreiro ás 11:30 horas. Deixarase un tempo no acuario, entre 11:30 e 12:00
para as reportaxes gráficas de prensa, evitando molestias nos momentos
posteriores para que se poida adaptar o animal ás súas novas circunstancias.
Trataremos de enviar algún material fotográfico posteriormente se tede
interese. Para calquera dúbida contactar no teléfono de coordinación.
Nigrán 25/02/2012
Departamento de comunicación da CEMMA
686989008