1. CERITA RAKYAT MUNA O MANU BHE ANDO-ANDOKE
Nando dhamani wawono, naandomo seghulu manu noposabhangka bhe segulu
ndoke. Tamaka welo posabhangkahando maitu mina naompona rampahano diuno
ndoke. Sekamaghuleo Ando-andoke nobhasi Manu dakumala daempali-mpali.
Nomaho kaawu norondo gholeo, Ando-andoke nogharomo. Pasina norakomo Manu
maka noburusi Wuluno. O Manu nopotahamighoo nokiido. Sabutuhano nopoli
nofulei.
O Manu nofulei kansuru. Kodawua kaawu mina nakodoho bhe kafuleihano
nagha, gaara nowuramo loso kaelatehano Kabhongo. Kabhongo maitu sabhangkano
mpuu-mpuuno. Nofekarimbamo maka nopesua welo loso kaelatehano kabhongo.
Nowura o Manu norato, kabaruno kabhongo. Pasina netula-tulaghoomo Kabhongo
kadhadhia sakotughuno podiuno Ando-andoke.
Nofetingeke anagha, o Kabhongo kansuru nomamara. Nobisaramo Kabhongo
ini,”Maimo dokala dofehalagho Ando-andoke nagha, mina naepandehao sepaliha
maanano doposabha-sabhangka”. Pasina dofodhalamo fekirindo so
dakumaradhagoo Ando-andoke ini. Gaara deghawamo fekiri dabhasi Ando-andoke
dakumala we pulo we sembalino tehi, nawatu noponoghoo takeseno kantisa
kobhakeno. Tamaka bhangka sokasawihando ini, bhangka karabu wutondo maighoo
ne bhatu awo.
Pasina noratomo wakutuuno o Manu nobhasi Ando-andoke dakumala we pulo we
sembalino tehi. Ando-andoke knsuru nohunda. Sehae gholeo kaawu doeremo
dokala. Dorato kaawu we wuntano tehi, dopobhantimo. Nokakuraaomu manu,”
abhentaemo ho!!!” Nobhalomo dua Kabhongo,”intagi sampe naendalo sepaliha”.
Iano nobisara peda amaitu, o Manu kansuru notitiwi bhangkanso ini.
Sabutuhano bhangka kasawihando nobhenta pasina kansuru noburubu. O
Kabhongo kansuru noleni we ghone. O Manu nohoro te wite. Ta Ando-andoke
nomoisa we tehi nopode-podea nesalo tulumi. Nompona kaawu, rampano mina
namande noleni, maka nomateghoo notondu we tehi.